የህይወት መንገዴ

እንደ ብዙሃኑ ወልጄ ከብጄ

የተፈጥሮን ጥሪ አድምጬ ፈቅጄ

አልኖርኩም በወጉ ኑሮዬን አቅጄ

ይልቅ እጓዛለሁ በቀለም ሰክሬ

ሱስ ሆኖብኝ እውቀት ይኳትናል እግሬ

እጆቼ ይደክማሉ ይናውዛል ቀልቤ

ይሰደዳል ልቤ ይዋኛል ሀሳቤ

በጥበብ መዓዛ ወደፊት ተስቤ

ስምግ አረፍዳለሁ ከብራና ከርቤ

እውላለሁ ሳስስ ስነጠቅ ወደላይ

ክንፍ አውጥቼ ስበር በደመና ሰማይ

ስፈትሽ የኖርኩት የዘመናት ቅኔ

በጥልቅ ትንታኔ በሀሳብ ምናኔ

በስጋ ድካሜ ለነፍሴ ስንቅ ሀሴት

ለህሊና እርካታ ለመንገዴ ስምረት

አንዳች ባገኝ ብዬ የሚያፀና ሕይወት

አልፎ ሂያጅ ደስታን የሚያዘልቅ በረከት

እድሜ እማይገድበው የማያረጅ እውነት

ቀለሙ የማይለቅ ደብዝዞ እማይጠፋ

ከነፍስ የሚዋደድ ሰፍሬ በጭልፋ

ከጠቢባን ባህር ጥቂት ከፈላስፋ

ለማቅናት ነው መንገድ የሚበጅን ተስፋ